ШҚО-да полиция мен жастар есірткі жарнамасына қарсы бірікті, деп хабарлайды F16.kz тілшісі Polisia.kz сайтына сілтеме жасап.
ШҚО Полиция департаменті есірткі қылмысына қарсы іс-қимыл басқармасының қызметкерлері Өскемен қаласының белсенді жастарымен бірге шаһар көшелеріне шығып, қолдарына қылқалам, бояу баллондарын алып, заңсыз жазулар мен есірткі жарнамасы бар граффитилерді бояды.
Жыл басынан бері полицейлер мен волонтерлер 450-ден астам граффити мен QR-кодты жойып, бояған. Сонымен қатар полиция қызметкерлері интернетте де жүйелі жұмыс жүргізіп жатыр: есірткі жарнамасы мен курьер ретінде жұмыс ұсынатын 9 200-ге жуық сайт пен сілтемелер бұғаттауға жіберілді.
– Жұмысымыздың негізгі бағыттарының бірі – профилактика. Өскелең ұрпақтың есірткінің қаупін түсініп, осы қатерден қорғауға белсене атсалысуы маңызды, – деді ШҚО ПД есірткі қылмысына қарсы іс-қимыл басқармасының бастығы Дәулет Жұмаділов.
Полиция тұрғындарды бұл мәселеге бейжай қалмауға шақырды. Есірткі жарнамасы жайындағы деректерді «10» нөміріне немесе «102» мобильді қосымшасы арқылы фотосуретті қоса отырып хабарлауға болады. Әрбір хабарлама қала мен интернет кеңістігін қауіпсіз ете түсуге көмектеседі.
