ШҚО-да полиция мен медицина қызметкерлері жүргізушілерге арнап профилактикалық акция өткізді, деп хабарлайды F16.kz тілшісі Polisia.kz сайтына сілтеме жасап.
Тарбағатай аудандық полиция бөлімінің қызметкерлері медицина мамандарымен бірлесіп, жол қозғалысы ережелерін сақтау және жүргізушілердің денсаулығын бақылаудың маңыздылығын түсіндіру мақсатында профилактикалық акция өткізді.
Іс-шара барысында автокөлік жүргізушілеріне қауіпсіздіктің негізгі қағидалары түсіндіріліп, артериялық қысымдары өлшенді.
Сонымен қатар жол үстінде жақсы хал-жағдайды сақтау жөнінде пайдалы кеңестер берілді. Құқық қорғаушылардың айтуынша, мұндай шаралар ықтимал қауіп-қатердің алдын алып, жолдағы төтенше жағдайлардың азаюына ықпал етеді.
– Полицейлер барлық көлік жүргізушілеріне үндеу жасайды: рөлге отырмас бұрын денсаулығыңызды тексеріңіз және барынша мұқият болыңыз. Жол үстінде телефон қолданудан, жолаушылармен алаңдататын әңгімелерден бас тартыңыз. Қарапайым ережелерді қатаң сақтау – өзіңіздің ғана емес, айналаңыздағы жолаушылардың да қауіпсіздігінің кепілі, – деп жазады дерек көзі.
