Облыс орталығында жыл соңына дейін екі медициналық нысанды қолданысқа беру жоспарланып отыр. Бұл туралы облыстық құрылыс, сәулет және қала құрылысы басқармасы басшысының міндетін атқарушы Ерназ Мұқатаев айтты, деп хабарлайды F16.kz.
Жыл соңына дейін Ана мен бала орталығында қайта жаңғыртылып жатқан перзентхана ашылуға тиіс.
Ана мен бала орталығының стационар ғимараты перзентханаға бейімделіп, қайта жабдықталып жатыр. Бүгінде нысанда әрлеу және инженерлік желілерді тарту жұмыстары аяқталуға жақын. Мамандар терезе жақтауларын әрлеп, бірінші қабатта электр монтаждау жұмыстарын жүргізуде. Екінші қабатта санитарлық-техникалық жабдықтар орнатылып, желдету жүйесі ретке келтіріледі. Бөлмелерді тазалау жұмыстары да қатар атқарылып жатыр, — деп атап өтті басқарма өкілі.
Ал қолданысқа берілетін екінші нысан — Онкология және хирургия орталығындағы хирургиялық корпустың жаңартылған бөлімі.
Оның бірінші, екінші және үшінші қабатындағы бөлімдері жаңартылуда. Қазіргі уақытта медициналық жабдықтар мен жиһаздар жеткізіліп, орналастырылып жатыр, — деді Ерназ Мұқатаев.
Бүгінде екі жобада да құрылыс жұмыстарының негізгі бөлігі аяқталған. Қалған жұмыстарды жыл соңына дейін тәмамдап, медициналық нысандарды пайдалануға беру көзделіп отыр.




