1 қыркүйекте облыс аумағында «Участок» республикалық жедел-алдын алу шарасы басталды. Тәртіп сақшылары алғашқы 14 күнде 75 мыңға жуық пәтер мен жеке үй, 4 мыңнан астам саяжай учаскелерін тексерген, деп хабарлайды F16.kz.
Сонымен қатар тіркелмеген 47 жалдамалы пәтер анықталып, тұрақты мекенжайы жоқ 59 тұлға ұсталған.
Қару иелерін бақылау да назардан тыс қалған жоқ. 1900 азаматтық қару иесін тексеріп, 20-ға жуық заңбұзушылық анықтадық. 6 тіркелмеген қару тәркіленді. Жалпы облыс бойынша үш мыңға жуық әкімшілік құқық бұзушылық тіркелді, — дейді ШҚО ПД Жергілікті полиция қызметі басқармасы бастығының орынбасары, полиция майоры Нұрлан Жарлығақов.
Сонымен қатар, полиция қызметкерлері түнгі рейд кезінде түрлі құқықбұзушылық жасаған 150 жасөспірімді ұстады. Олар түнгі көңіл көтеру орындарында ересектерсіз жүру, алкоголь ішу, мас күйінде қоғамдық орындарда жүргені үшін жауапқа тартылды.
