Еліміздің алты өңірінде ауыл шаруашылығы өнімдері ұрлығының жолын кесу мақсатында «Егін» жедел-профилактикалық іс-шарасы жүргізіліп жатыр, деп хабарлайды F16.kz тілшісі Polisia.kz сайтына сілтеме жасап.
12 қыркүйектен бастап еліміздің алты өңірінде, атап айтсақ, Ақмола, Солтүстік Қазақстан, Қостанай, Қарағанды, Павлодар және Шығыс Қазақстан облыстарында ауыл шаруашылығы өнімдерін ұрлаудың алдын алу, сондай-ақ биылғы егіннің сақталуын қамтамасыз ету мақсатында «Егін» атты жедел-профилактикалық іс-шарасы өтуде.
Іс-шараға полиция қызметкері жұмылдырылып, тәулік бойы кезекшілік атқаратын 55 жылжымалы топ құрылған. Құқық қорғау органдарының өкілдері шамамен 2 мыңға жуық астық сақтау және өңдеу нысанын, сондай-ақ егін жинау жұмыстарына тартылған 1 100-ден астам көлік пен арнайы техниканы тексерді. Тексеру нәтижесінде жаңа өнімді ұрлаудың 8 дерегі анықталды.
Полицейлер 141 тоннадан астам ұрланған астық, 175 келіге жуық басқа дәнді дақылдар, егіс алқаптарынан жымқырылған 200 литрден астам жанармай және ауыл шаруашылығы техникасына тиесілі 15 қосалқы бөлшекті тәркіледі. Сонымен қатар төрт қылмыстық топтың заңсыз әрекетінің жолы кесіліп, 18 адам ұсталды.
– Полиция бұл бағыттағы іс-шараларды жалғастырып жатыр. Ауыл шаруашылығы өнімдерінің сақталуына бақылау егін жинау науқаны толық аяқталғанға дейін күшейтілмек, – деп жазады дерек көзі.
