Шығыс Қазақстандағы жұмыспен қамтудың өңірлік картасы аясында Алтай ауданында 1 902 жұмыс орны құрылған. Бұл туралы ШҚО Өңірлік коммуникациялар қызметінде өткен баспасөз мәслихатында аудан әкімі Ренат Құрмамбаев мәлім етті, деп хабарлайды F16.kz.
Оның ішінде Мемлекет басшысының әр 10 мың тұрғынға 100 жаңа жұмыс орнын ашуға қатысты тапсырмасына сәйкес 609 тұрақты жұмыс орны ашылған.
Алтай ауданында жұмыссыздық деңгейі 4,5%-дан 4,2%-ға дейін төмендеді. Субсидияланатын жұмыс орындарына 1 135 азамат орналастырылса, аудан кәсіпорындары мен ұйымдарындағы бос орындарға 1 660 адам жұмысқа тұрды. Соңғы екі жылда аудан колледждері мен Зубовск кентіндегі «Фаворит» ЖШС-ның оқу орталығы базасында 62 жұмыссыз азамат электромонтер, ағаш өңдеу станогының операторы, аспаз сынды мамандықтары бойынша кәсіби білім алды, — деді ол.
Чапаев ауылындағы ауыл шаруашылығы колледжінде «Көкөніс немесе жеміс консервілерін өндіру операторы» мамандығы ашылып, 1 қазаннан бері 4 адам онлайн форматта оқып жатқан көрінеді.
Сондай-ақ мансап орталығында 14 бос орындары жәрмеңкесі өткізілген. 2024-2025 жылдары аудан бойынша әлеуметтік осал топтағы азаматтардың кәсіпкерлік бастамаларын қолдау мақсатында 25 грант берілген.
