ШҚО полицейлері 82 жастағы әжеден ірі көлемде қаражат жымқырған күдіктіні қолға түсірді, деп хабарлайды F16.kz.
Белгілі болғандай, зейнеткердің үйдегі телефонына белгісіз әйел қоңырау шалып, қызы ретінде таныстырған және жол-көлік оқиғасына ұшырағанын айтып, мәселені шешу үшін ақша қажет деп сендірген. Осылайша қар әйел өз пәтерінде бейтаныс ер адамға қаражатты қолма-қол берген.
Алаяқтардың әрекетінен келтірілген шығын 1 500 000 теңгені құраған. Полицейлер бейнебақылау инспекторларымен бірлесіп, күдіктіні жедел түрде анықтады. Ол өзге облыстан келген 22 жастағы азамат екені белгілі болды. Аталған факті бойынша сотқа дейінгі тергеу басталып, тергеу әрекеттері жалғасуда – делінген Polisia.kz таратқан ақпаратта.
Полиция департаменті тұрғындарды абай болуға, әсіресе қарт кісілерге ерекше назар аударып, сөйлесіп тұруға шақырады. Бейтаныс адамдарға ешқашан ақша бермеуді және қандай да бір ақпаратты әрдайым жақындарыңыздан нақтылап отыруды ескертеді. Күмән туындаған жағдайда бірден 102 арнасына хабарласыңыздар.
