Көше кезген қаңғыбас иттер мәселесі Өскеменде жиі айтылып келеді. Әсіресе, баласын мектепке таситын ата-аналар иесіз жануардан көп қауіптенеді. Бүгін аймақ басшысымен кездескен шаһар тұрғындары көпті толғандырған бұл мәселені қайта көтерді, деп хабарлайды F16.kz.
Облыс әкімінің сөзінше, биыл иттерді вакцинациялау мен стерилизациялауға 90 миллион теңге бөлінсе, келер жылы қаржы көлемі 100 миллион теңгеге артады.
Біз қаржы бөлумен ғана шектелмеуіміз керек. Қаңғыбас иттердің көбеюіне адамдардың да кінәсі бар. Әр тұрғын үй жануарын алар алдында толық жауапкершілік алуға тиіс. Жазда асырап, қыс түскенде қараусыз қалдырып кете бергендіктен бүгінде иесіз иттер қоғамға қауіп төндіріп отыр, — деді ШҚО әкімі Нұрымбет Сақтағанов.
Сонымен қатар, аймақ басшысы иттерді атуға жол берілмейтінін, жұмыстар заң аясында жүргізілетінін атап өтті.
