Бүгін, 29 сәуірінде Шығыс Қазақстан облыстық экология департаментінің қызметкерлері полициямен бірлесіп Үлбі өзені жағалауындағы су қорғау аймағында рұқсат етілмеген қоқыс үйінділерін анықтауға бағытталған рейд жүргізді, деп хабарлайды F16.kz.
Бұл шара «Таза Қазақстан» республикалық акциясы аясында және әлеуметтік желілерге жүргізілген мониторинг нәтижелері негізінде ұйымдастырылды.
Аумақты тексеру барысында тұрмыстық заттарды заңсыз тастау жағдайлары анықталды. Осы факті бойынша Өскемен қаласының тұрғын үй-коммуналдық шаруашылығы, жолаушылар көлігі және автомобиль жолдары бөлімінің атына қоқыс үйіндісін тез арада жоюды талап еткен ұсыныс жіберілді, – деп жазды экология департаментінің баспасөз қызметі.
Талаптың орындалуы департаменттің ерекше бақылауына алынды.
Осы орайда экология департаментінің мамандары аймақ тұрғындарын санитарлық тәртіпті сақтауға және қоршаған ортаға ұқыпты қарауға шақырады.
Фото: ШҚО экология департаменті/видеодан алынған кадр
