Президент жанындағы Мемлекеттік басқару академиясына биылғы 1 сәуірден бастап құжаттар қабылдау басталды. Өтініштер онлайн форматта Admission ақпараттық жүйесі арқылы 25 маусымға дейін қабылданады, деп хабарлайды F16.kz.
Бұл туралы Президент жанындағы Мемлекеттік басқару академиясы облыстық филиалының директоры Жанар Буканова өңірлік коммуникациялар қызметі алаңында мәлімдеді.
Академия биыл 12 білім беру бағдарламасы бойынша үміткерлерді оқуға қабылдайды. Оның ішінде тоғыз магистратура және үш докторантура бағдарламасы бар. Магистратураға 120, ал докторантураға 12 мемлекеттік білім гранты бөлінген.
Биылғы қабылдау науқанының басты жаңалығы – «Цифрлық мемлекеттік басқару» (MDPA) атты жаңа магистратура бағдарламасының ашылуы. Бұл бағдарлама цифрлық шешімдерді әзірлеу мен енгізуге, сондай-ақ мемлекеттік сектордағы цифрлық трансформацияны басқаруға бағытталған.
Сонымен қатар мемлекеттік қызмет өтіліне қойылатын талаптар күшейтілді. Енді магистратура бағдарламаларына түсу үшін үміткердің мемлекеттік қызметте кемінде 3 жылдық еңбек өтілі болуға тиіс. Ал «Мемлекеттік басқару» (MPA) бағдарламасына – 5 жыл, «Мемлекеттік саясат» (MPP) бағдарламасына – 4 жыл еңбек өтілі қажет.
Ақылы бөлімге қабылдану ережелері де нақтыланды. Енді мемлекеттік қызметшілер ғана емес, квазимемлекеттік сектор мен ведомстволық бағынысты ұйымдардың өкілдері де оқи алады.
Үміткерлер бірнеше кезеңнен өтеді: 28 маусым мен 1 шілде аралығында – аналитикалық эссе жазу (онлайн), 8–23 шілде аралығында – офлайн сұхбат. Аралық нәтижелер 25 шілдеде жарияланады. Құжаттарды рәсімдеу және келісімшартқа отыру мерзімі – 7 тамызға дейін. Оқу процесі дәстүрлі түрде 1 қыркүйекте басталады.
Фото: ШҚО өңірлік коммуникациялар қызметі
