2019 жылдан бері ҚР Ұлттық ұланының 5518 әскери бөлімінде (Өскемен қаласы) әскери қызмет атқарып келе жатқан кіші сержант Валентин Чехов өзін тәртіпті, жауапкершілігі жоғары әрі физикалық тұрғыдан даярлығы мықты әскери қызметші ретінде таныта білді, деп хабарлайды F16.kz тілшісі «Шығыс» өңірлік қолбасшылығының баспасөз қызметіне сілтеме жасап.
Валентин қызметтен тыс уақытын спортқа арнайды. Соңғы төрт жыл бойы пауэрлифтингпен белсенді түрде айналысып жүр. 2024 жылдан бастап ол кәсіби деңгейдегі жарыстарға қатысып, «NPA Kazakhstan» федерациясының құрамында өнер көрсете бастады. Алдағы уақытта өз спорттық шеберлігін басқа да бірлестіктер аясында дамытуды жоспарлап отыр.
Валентиннің спорттық мансабындағы алғашқы үлкен қадамы – 2024 жылғы ақпанда Алматы қаласында өткен «Алатау батырлары» атты Қазақстан кубогы болды. Бұл – оның бірінші ресми жарысы еді және ол дода Валентиннің жеңісімен аяқталды.
Сол жылдың маусым айында ол Қонаев қаласында өткен «Шалғай жағалаулардағы «Темір бауырлар» турниріне қатысты. Мұнда жерлесіміз екі бірдей санатта өнер көрсетті: қатаң және классикалық штанга көтеру. Екеуінде де бірінші орын иеленіп, спорт шеберлігіне үміткер атанды.
Келесі маңызды белес – 2024 жылғы желтоқсан айында Алматыда өткен «Strong Generation 4» қысқы турнирлер сериясы. Бұл жолы да Валентин мықтылығын дәлелдеп, үздіктер қатарынан көрінді. Атап айтсақ, қатаң көтеру санатында үшінші орынға, ал классикалық көтеруде екінші орынға қол жеткізді.
Тағы бір жарқын жеңіске Валентин биылғы 27-29 маусым аралығында өткен «Шалғай жағалаулардағы Темір бауырлар 4» турнирінде жетті. Қатаң штанга көтеру санатында бірінші орынды иеленіп, спорт шебері атағын жеңіп алған өскемендік сарбаз классикалық көтеруде де дәл осындай нәтиже көрсетті. Сонымен қатар экипировкасыз тұра тарту (становая тяга) санатында алғаш рет күш сынап, 140 келі нәтижесімен бірінші орынды жеңіп алды.
Бұл – кіші сержант Валентин Чеховтың жолы, қара күшке, табандылық пен ұмтылысқа толы жол. Ол әскери қызмет пен кәсіби спортты ұштастыруға болатынын, бұл екі ұғым бір-бірін толықтырып, адамды шыңдай түсетінін дәлелдеді. Алда Валентинді жаңа мақсаттар, жаңа жарыстар мен жаңа жеңістер күтіп тұр.
