Облыс орталығына ауа сапасын бақылауға арналған жаңа жылжымалы экологиялық зертхана әкелінді. Құны 65,5 млн теңге тұратын зертхананы алуға Halyk Bank демеушілік еткен, деп хабарлайды F16.kz.
Бүгін ШҚО әкімі Нұрымбет Сақтағановтың қатысуымен өткен жиында Halyk Bank басқарма төрағасының орынбасары Тілеген Маткенов облыстық экология департаментіне зертхана кілтін табыстады.
Енді экологтер осы көлікпен қаланың кез келген жеріне тоқтап, зерттеу жұмыстарын жүргізіп, ауадағы зиянды шығарындылар мөлшерін нақты біле алады. Содан соң жинақталған мәліметті кәсіпорындарға, табиғат қорғау прокуратурасына жіберіп, тиісті шараларды қабылдайды. Демеушілік көрсеткен банк басшылығына облыс халқының атынан алғыс білдіремін, — деді облыс әкімі.
Зертхана ауаны жедел талдауға арналған заманауи жабдықтармен жабдықталған. Қаладағы барлық негізгі ластаушы, атап айтқанда күкірт диоксиді, күкіртсутек, азот оксидтері, хлор, аммиак және өзге де компоненттерді жоғары дәлдіктегі электрохимиялық әдіспен талдайды.
Банк үшін экологиялық бастамаларды қолдап қана қоймай, өңірдің өзекті мәселелерін шешуге көмектесу өте маңызды. Бұл біздің негізі принциптеріміз бен қоғам алдындағы жауапкершілігіміздің көрінісі, — деп атап өтті Тілеген Маткенов.
Аймақ басшысының айтуынша, аталған жылжымалы зертхана банктің қолдауымен жүзеге асқан алғашқы жоба емес. Осы уақытқа дейін әлеуметтік және қайырымдылық шараларына да белсене қатысқан.
Биыл Halyk Bank облыстық ауруханаға құны 12,6 млн теңге болатын науқастар мен медперсоналды тасымалдауға арналған автокөлік сатып алып берді. Сондай-ақ «Мектепке жол» акциясы аясында көпбалалы отбасылардан шыққан 100 бірінші сынып оқушысына кеңсе керек-жарақтарының толық жиынтығын сыйға тартты, — деді Нұрымбет Сақтағанов.
Айта кетейік, Өскеменнің экологиялық ахуалы өзекті мәселелердің біріне айналған. Қалада қолайсыз метеожағдай жарияланып, газ бен тұман тұмшалайтын күндер аз емес. Облыс әкімі Орталық коммуникациялар қызметі алаңында өткен баспасөз мәслихатында қала тұрғындарын алаңдатқан мәселені шешу үшін бірқатар шара қолға алынғанын айтқан.
