Облыс прокуратурасы есірткі қылмысына қарсы ауқымды акция бастады. Шара барысында қаладағы заңсыз есірткі жарнамалайтын граффитилер жойылды, деп хабарлайды F16.kz.
«Есірткі граффити» ауқымды акциясы қоғамда «Заң және Тәртіп» қағидатын нығайту мақсатында қолға алынған. Акцияға қала прокуратурасының, полицияның, жергілікті атқарушы органдардың қызметкерлері және жастар қозғалысының белсенділерінен құралған 100-ге жуық адам қатысты.
Тұрғын үй аулаларын аралау барысында 50-ден астам есірткі граффитилері анықталды. Рейдтердің нәтижесінде «Есірткі құралдарын насихаттау немесе заңсыз жарнамалау» бойынша 8 қылмыстық іс қозғалды. Мұндай әрекет — ауыр жазаға, тіпті бас бостандығынан айыруға әкелуі екенін еске саламыз, — деді облыстық прокуратура өкілдері.
Сондай-ақ құқық қорғау органдарының өкілдері егер күмәнді жазуларды байқаған жағдайда дереу полицияға хабар беру керектігін ескертеді.
