Жыл басынан бері облыста сарып ауруын жұқтырған үш жағдай тіркелген, оның екеуі Үлкен Нарын ауданында болса, біреуі –Марқакөлде. Бұл туралы Шығыс Қазақстан облысының санитарлық-эпидемиологиялық бақылау департаменті басшысының орынбасары Сәуле Слямғазина өңірлік коммуникациялар қызметі алаңында өткен брифингте мәлім етті, деп хабарлайды F16.kz.
Ресми ақпаратқа сүйенсек, былтыр елімізде сарып ауруының 564 расталған жағдайы тіркелген, оның ішінде 73 бала, 44 жасөспірім бар. Бұл дертпен сырқаттану деңгейі бойынша Шығыс Қазақстан облысы Жетісу мен Жамбылдан кейін үшінші орында тұр.
Оның айтуынша, науқастардың дені еңбекке қабілетті жастағы (18-59 жас) адамдар.
Сарып ауруының әрбір жағдайы бойынша адамдар арасында аурудың таралу жолдары мен факторларын белгілей отырып, эпидемияға және эпизоотияға қарсы іс-шаралар жүргізілген. Облыс аумағында барлығы 33 инфекция ошағы анықталып, байланыста болған 119 адам тексеруден өтті. Олардың ішінде 14 адамнан (35%) ауру анықталды (Глубокое, Зайсан, Ұлан , Үлкен Нарын аудандары және Өскемен қаласы). Қарым-қатынас жасаған адамдар жарты жыл көлемінде диспансерлік бақылауда болды.
Эпидемиологиялық тексеру нәтижесінде адамдарға ауру қайдан жұққаны анықталған. Жұқпалы дерт адамға көп жағдайда малдан жұққан.
Биылғы алғашқы тоқсанда сарыптың үш жағдайы (былтыр осы кезеңде екі жағдай) анықталды. Атап айтқанда, сыртқаттанғандардың екеуі Үлкен Нарын ауданында, біреуі Марқакөлде анықталған. Эпидемиологиялық тексеру кезінде оларға ауру бұрын сарып болған малдан жұққаны анықталды. Олармен байланыста болған алты адам медициналық бақылауға алынып, тиісті қауіпсіздік шаралары жүргізілді.
Фото: ШҚО өңірлік коммуникациялар қызметі
