«Өскемен титан-магний комбинатындағы» жағдайдан кейін қалаға ҚР Экология және табиғи ресурстар министрі Ерлан Нысанбаев келді, деп хабарлайды F16.kz тілшісі.
Министр кәсіпорынға барып, оқиғаның мән-жайымен танысты. Сондай-ақ компания басшылығымен, жергілікті билік өкілдерімен кездесті.
«Өскемен титан-магний комбинаты» АҚ-ға қатысты жоспардан тыс тексеру басталатын болды. Тексеру аймақ экологиясының жағдайына әсер етуі мүмкін кәсіпорын қызметінің барлық аспектілерін қамтиды.
Сонымен қатар экология министрі бірқатар тапсырма берді:
– Экологиялық стандарттардың бұзылуына байланысты кәсіпорынның әрекеттерінің (немесе әрекетсіздігінің) заңдылығын бағалау, сондай-ақ болған оқиғаға құқықтық бағалау жүргізу.
– Қолданыстағы заңнама шеңберінде барлық қажетті ықпал ету шараларын, соның ішінде лауазымды тұлғаларды және жалпы кәсіпорынды жауапкершілікке тартуды қабылдау.
– Болашақта осындай оқиғалардың алдын алу үшін шұғыл шаралар қабылдау, оның ішінде өңірдің басқа объектілерінде экологиялық талаптардың сақталуын бақылауды күшейту.
Тексеру нәтижелері туралы қосымша хабарланады.
Фото: ШҚО әкімінің баспасөз қызметі
