Өскемен қаласының мектеп оқушылары аймақтық, республикалық және халықаралық деңгейдегі жарыстарға, хакатондарға, олимпиадалар мен көрмелерге белсенді қатысып келеді, деп хабарлайды F16.kz тілшісі.
Облыс аумағында 344 тегін IT-сынып, 150 робототехника кабинеті және 22 STEM-кабинет жұмыс істейді. Бұл орталықтарда оқушылар цифрлық технологияларға қызығушылық танытып, бағдарламалау, 3D модельдеу және робототехника бағыттары бойынша білім алып жатыр.
Өскемен қаласында техникалық үйірмелерге 1383 бала қамтылған, оның ішінде 712-сі – робототехникамен, 439-ы – бағдарламалаумен, 232-сі – 3D модельдеумен айналысады. IT-құзыреттерін тереңдетіп оқыту нақты нәтиже көрсетіп жатыр. Мәселен, информатика, робототехника және STEАM-инженерия бойынша облыстық зияткерлік байқаулардың 33 жеңімпазының 19-ы – Өскемен қаласының мектептерінде оқиды, ал 13-і республикалық жарыстардың жүлдегері атанды.
Жыл сайын «ŞYĞYS ÖRKENІ» IT-хакатоны, «Skills for Geeks» чемпионаты, «New Generation» фестивалі сияқты іс-шаралар өткізіледі. Былтыр 23 мамырда өткен «New Generation» фестиваліне 100-ден астам оқушы 77 жобамен қатысты, олардың ішінде Өскемен қаласының 48 оқушысы 23 жобасын ұсынған.
Фото: Махаббат Ахметжанова
