Соңғы жылдары Шығыс Қазақстанда жолдардағы қауіпсіздікті нығайту мақсатында айтарлықтай жұмыс атқарылуда. Бұл қалааралық трассалармен қатар, елдімекендер ішіндегі көше жолдарына да қатысты, деп хабарлайды F16.kz тілшісі.
Бүгін Өскеменде осы бағыттағы жұмысты ширатуға бағытталған тағы бір жобаның таныстырылымы өтті. Шаһардағы Ыбырай Алтынсарин атындағы №39 орта мектепте «Мектепке апарар қауіпсіз жол» («Safe way to school») жобасының мүмкіндіктері паш етілді. Аталмыш жобаны авторы – осы білім ордасының 10 сынып оқушысы Әлия Жеңісбекова.
– Бүгін балалардың үйден мектепке дейінгі жолын барынша қауіпсіз ету мақсатында жасалған жобамды таныстырдым. Бұл жоба бірінші кезекте инфрақұрылымдық мәселелерді шешуді көздейді. Мәселен, кей көшелерде жаяу жүргінші өткелдері аз, енді бір жерлерде тротуар жетіспейді. Міне, осындай мәселелерді мұқият зерттеп, жобама енгіздім. Енді, оны көпшіліктің назарына ұсынып отырмын, – дейді жоба авторы.
Айта кетейік, бұл күні мектептің акт залында өткен жобаның тұсаукесеріне облыстық прокуратура мен жергілікті полиция өкілдері де қатысты.
– Бүгін шын мәнінде көпшілік үшін пайдасы мол болатын жобаның таныстырылымын көрдік. Бұл – жай ғана бір адамның бастамасы емес, бұл – барлық оқушының мектепке дейінгі жолын қауіпсіз етуге бағытталған ауқымды жоба. Күн сайын мектеп жасындағы мыңдаған бала көлік ағыны қатты жолдармен, қауіпті құрылыс нысандарының аумағымен өтуге мәжбүр. Мұның бәрі қаншалықты қауіпті екені айтпаса да түсінікті. Сондықтан қазірден бастап ахуалды оңалтудың жолдарын қарастыруымыз керек. Бүгін бәріміз куә болған жобаның да мақсаты сол. Мектепке дейінгі жолды қауіпсіз әрі жайлы етуге бағытталған жұмыстарға оқушылар мен ата-аналары, білім ошағының өкілдері ғана емес, жергілікті атқарушы билік пен құқық қорғау органдары да өз үлесін қосуға тиіс. Прокуратура қызметкерлері де бұл бастамадан тыс қалмауы керек, – дейді маңызды жобаның таныстырылымына қатысқан Шығыс Қазақстан облысы прокуратурасы басқармасының аға прокуроры Рауан Сайранбекұлы.
Жоғарыда айтылғандай, жаңа жобаның негізгі мақсаты – оқушылар маршруттарының қауіпті учаскелерін анықтау және жою, сондай-ақ жергілікті атқарушы биліктің назарын қауіпсіз инфрақұрылым құру мәселесіне аудару.
Фото: pixabay.com
