Биыл Зайсан ауданында ет өңдеу зауыты салынып, минералды су мен алкогольсіз сусындар шығаратын цех іске қосылады. Бұл туралы бүгін ауданда жұмыс сапарымен жүрген Шығыс Қазақстан облысының әкімі Нұрымбет Сақтағанов тұрғындармен кездесуде айтты, деп хабарлайды F16.kz.
Биыл Дайыр ауылында минералды су мен алкогольсіз сусындар шығаратын жаңа цех ашу, Зайсан қаласында ет өңдеу зауытын салу, көкөністер мен жемістерді консервілеу цехын іске қосу және басқа да жобалар жүзеге асырылады. Сондықтан Зайсан ауданының әкіміне өңірді дамыту жөніндегі жоспар бойынша іс-шаралардың сапалы және уақтылы орындалуын қамтамасыз ету қажет, – деді Нұрымбет Сақтағанов.
Сонымен қатар аймақ басшысы осы жылы Айнабұлақ ауылында кемпинг, қызыл кірпіш шығаратын зауыт салу, Қарабұлақ ауылында балық өңдеу зауытын қалпына келтіру жобалары жүзеге асырылатынын атап өтті.
Фото: F16.kz
