Катонқарағай ауылына әуежай салынбайтын болды. Себебі ұшақтардың ұшып-қонуына қолайсыз екен.
Енді әуежайдың құрылысына Солдатово ауылының тұсындағы жазық қарастырылып жатыр. Ал Зайсан ауданы бойынша Сәтбай ауылындағы ескі әскери әуежайдың орнын қарастырылмақ, деп хабарлайды F16.kz сайты.
Катонқарағайда әуежай салынады деп айтылғалы он жылдан асты. Халық оған сенуді де қойған. Бірақ Президент Қасым-Жомарт Тоқаев өз Жолдауында Катонқарағай мен Зайсан аудандарында туризмнің әлеуетін дұрыс пайдалану қажет екендігіне назар аудартып, осы екі ауданға әуежай салынатынын айтты.
Мемлекет басшысының аузынан шыққан сөздің орындаларына көзі жетіп жүрген халықтың қуанышы қойнына сыймай жатыр. Себебі Катонқарағай мен Зайсанның туристік әлеуеті расымен жоғары. Сондықтан бұл жаққа әуежай қажет-ақ. Ал әуежай ашылып, жолдар жөнделсе, туризм мен кәсіпкерлік сөзсіз дамиды.
Катонқарағай мен Зайсанда әуежай салынса, бұл көршілес жатқан аудандар үшін де тиімді болмақ. Мысалы, Зайсандағы әуежайға Тарбағатай ауданының орталығы Ақжардан 30-40 минутта жетуге болады.
Осы ретте Президенттің тапсырмасы қашан орындалады деген заңды сұрақ туындай. Бұл туралы Жолаушылар көлігі және автомобиль жолдары басқармасының басшысы Нұржан Жұмаділов айтып берді.
