Ресеймен шекаралас Риддер қаласы Шығыс Қазақстан облысының орталығы Өскеменнен 120 шақырым қашықта. Батыс Алтайдың баурайындағы кеншілер шаһарында 50 мыңнан астам адам тұрады. Мұндағы халықтың дені кен өндірісінде еңбек етеді.
Ресейлік тау-кен инженері Филипп Риддердің есімін еншілеген кенді шаһарда бірнеше шағын аудан бар. Солардың бірі – жергілікті жұрт “ДОСААФ” атап кеткен шағын аудан. Орталық қазандыққа қосылған жылу желісі жоқ, жолы батпақ, ауызсу тартылмаған, көшелері тас қараңғы елді мекенде тұрып жатқан тұрғындар жергілікті биліктің назарынан тыс қалғандарына налиды.
