Көшкен ел, көріксіз ауыл... Қайта құрылған Марқакөл ауданының бүгінгі тыныс-тіршілігі қалай?

Президент Қасым-Жомарт Тоқаевтың жарлығымен биыл қайта құрылған Марқакөл ауданында қазір бар-жоғы 7 мыңнан астам адам қалған.

Халқы жылдан-жылға азайып бара жатқан шекара түбіндегі ауданның тыныс-тіршілігін көріп, шалғайдағы тұрғындардың тұрмысымен жақынырақ танысу үшін F16.kz тілшілері Марқакөл өңірінде болып қайтты.

Арнайы сапардан түсірілген фотосуреттерді оқырман назарына ұсынамыз. Суреттер сөйлесін.

$\"\"$ Марқакөл ауылына кіреберіс қақпа. Ауыл азаматтарының қолдауымен тұрғызылған.

$\"\"$ Өскемен-Марқакөл республикалық тасжолы. Қыстыгүні бұл жол жиі жабылады. Әсіресе, қар қалың жауғанда және боран-шашын болғанда қатынау қиындайды.

$\"\"$ $\"\"$ $\"\"$ Марқакөл ауданының орталығындағы құрылысы аяқталмай қалған жаңа спорт нысаны. Жобаның құны – 433 млн теңге. Спорт кешенінің құрылысы 2022 жылы басталған. Алайда жұмыс жол ортада тоқтап, нысан межелі уақытта қолданысқа берілмей қалды. Қазір спорт кешенінің есік-терезелері қирап, қабырғасы құлап жатыр.

$\"\"$ $\"\"$ Шекараға таяғанда ұялы телефонға «Қытайға қош келдіңіз!» деген хабарлама келеді. «Бұл жергілікті халыққа моральдық-психологиялық тұрғыдан жаман әсер етеді» дейді Парламент Мәжілісінің депутаты Ерлан Саиров.

$\"\"$ $\"\"$ Алты-жеті түтін қалған Былғары Табыты ауылында мектеп те, медициналық пункт те жоқ. Ұялы байланыс пен интернет те тартылмаған. Тұрғындар жергілікті байланыс операторының роумингі арқылы «қытай интернетін» пайдаланып отыр.

$\"\"$ $\"\"$ $\"\"$ Қазақстан ауылындағы қаңырап тұрған құдық. Бұл елдімекенде «Ақбұлақ» бағдарламасы аясында ауызсу құбыры тартылып, құдықтар орнатылған. Бірақ тұрғындар мемлекеттік бағдарламаның игілігін әлі көре алмай отыр.

$\"\"$ Марқакөл ауылының байырғы тұрғыны, ардагер журналист Абзалбек Мұхаметжанов шекара маңындағы елдімекендерден халықтың жаппай көшіп жатқанына алаңдайды.

$\"\"$ Аудан орталығында ескі ғимараттарды жөндеу қарқынды жүріп жатыр. Бұл ғимараттарға мемлекеттік мекемелер орналасатын болады.

$\"\"$ Қайта құрылған ауданда көрнекі орындар аз. Әзірге ауылдың ажарын ашып тұрған жалғыз нысан – Марқакөл мешіті.

$\"\"$ Ауылды «асырап отырған» ескі трактор. Жем-шөп, отын-көмір бәрі осы трактормен жеткізіледі. Бірақ жыл өткен сайын көне техниканың жүруінен бұзылып тұруы жиілеген. Ал оның қосалқы бөлшектері удай қымбат, үлкен қалалардан тапсырыспен алдырады.

$\"\"$ 40 шақты отбасы ғана түтін түтетіп отырған Қазақстан ауылы. Он жыл бұрын бұл ауылда 80 үй болатын.

$\"\"$ $\"\"$ Тал-терегі қурап, жаңбырдан кейінгі жолдары езіліп, қора-жайларының сыртын су айғыздаған ауылдың келбеті жүдеу.

$\"\"$ Қазақстан ауылының орталық көшесі. Асфальтты қойып қиыршық тас төселмеген қара жол жаңбыр жауса аяқ алып жүргісіз ми батпаққа айналады.

$\"\"$ Ауыл тұрғындары ардагерлерін ерекше құрметтейді. Жүдеп-жадаған көшеге сән беріп тұрған ескерткіш тақта ғана. Адамдар кейде осы жерге келіп фотосуретке түседі.

$\"\"$ Бұл жақтың халқы малмен жанын бағып отыр. Бірақ соңғы жылдары мал өсіріп пайда табу да қиындап кеткен. Жем-шөпке, жанар-жағармайға шашылатын шығын көп. Ал малды сойып, етін қалаға апарып өткізудің азабын айтпаса да белгілі. Адамдар төрт түлігін алыпсатарларға нарықтан төмен бағаға сатуға мәжбүр.