«Маралдыға келуге не кедергі? Неге халықтан қашып жүрсіз?» деген әлеуметтік желі қолданушысының сауалын «Хақ медиа» журналисі Қожахмет Кеңесбеков Шығыс Қазақстан облысының әкімі Ермек Көшербаевқа қойды, деп хабарлайды F16.kz сайты.
— Әлеуметтік желілерде Шығыс Қазақстан облысы, Күршім ауданы, Маралды ауылының экологиясына қатысты көп сұрақтар қойылады. Әлеуметтік желі қолданушысы былай деп сұрақ жолдапты: «Маралдыға келуге не кедергі? Неліктен халықтан қашып жүрсіз?». Жалпы ауыл халқы екі жылға жуық уақыттан бері Маралдыға келе алмай жатқаныңызды айтып отыр. Осыған жауап берсеңіз, – деді Қожахмет Кеңесбеков.
Бұл сұраққа облыс әкімі:
– Кім айтты мені қашып жүр деп? Мен айттым, барам дедім. Уақыт келгенде барамын. Облыста 300-ден астам ауыл бар. Маған айтыңызшы, неге онда Маралды халқы төрт жылда ауылға қанша ақша бөлінгенін айтпайды? Биыл бір жылда 1,5 млрд теңге бөлінді, ал оның алдындағы төрт жылда жиыны 500 млн теңге бөлінген. Осыны неге айтпайсыздар? – деді.
Бүгін Өскеменде Орталық коммуникациялар қызметінің көшпелі брифингі өтті. Брифингте Шығыс Қазақстан облысының әкімі Ермек Көшербаев өңірдің әлеуметтік-экономикалық дамуы туралы баяндап, БАҚ өкілдерінің сұрағына жауап берді.
Фото: t.me/shko_resmi
