Тарбағатай ауданында суға кеткен балықшының денесін іздеу жұмыстары бүгін төртінші күн қатарынан жалғасып жатыр, деп хабарлайды F16.kz.
ШҚО ТЖД баспасөз қызметінің мәліметіне сүйенсек, Шорға ауылының 1986 жылғы тұрғыны 22 қыркүйек күні балық аулауға барған. Көл бетіне қайығымен жалғыз өзі шыққан ол қайтып оралмады.
Оқиға Шорға ауылының маңындағы Зайсан көлінде болған. Қазіргі уақытта іздеу жұмыстары жүргізіліп жатыр. Қосымша күш ретінде құтқарушылар тартылып, сүңгуір жіберілді, — деді департаменттің баспасөз қызметі.
Ауыл тұрғындары да іздеу жұмыстарына белсене араласқан. Алайда, әзірге еш нәтиже болмай отыр.
