Шығыс Қазақстан облысында отбасылық-тұрмыстық құқық бұзушылықтар азайғаны байқалады. Биылғы жылдың он айының қорытындысы бойынша, мұндай деректер саны 146-дан 117-ге төмендеген, деп хабарлайды F16.kz.
Облыстық полииция департаментінің мәліметіне сүйенсек, бүгінде профилактикалық жұмыстар, дағдарыс орталықтары мен психологтардың бірлескен жұмысы жүйелі түрде жүргізіледі. Бұл бағытта формалды шаралар ғана емес, отбасындағы қиындықтарды ерте анықтауға және нақты көмек көрсетуге басымдық берілген.
Жыл басынан бері отбасылық-тұрмыстық салада құқыққа қайшы әрекет жасаған 3 922 адам ӘҚБтК-нің 73-бабы бойынша әкімшілік жауапкершілікке тартылды. Учаскелік полиция инспекторлары жәбірленушілерді қорғау мақсатында 2 917 қорғау нұсқамасын шығарды. Сондай-ақ сот шешімімен құқық бұзушылардың мінез-құлқына қатысты 722 ерекше талап белгіленді, — дейді ШҚО ПД баспасөз қызметі.
Күнделікті рейдтермен қатар, өңірде «Қауіпсіз үй», «Зорлық-зомбылықсыз Қазақстан», «Бізден сұраңыз, біз жаныңыздамыз» және «Сталкингке жол жоқ» атты әлеуметтік акциялар да өткізіліп отырады. Олардың мақсаты — қиын жағдайға тап болған адамдарға көмек көрсету және ешкімнің өз мәселесімен жалғыз қалмауына ықпал ету.
Көмекке мұқтаж әрбір адам 111 және 150 сенім телефондарына хабарласа алатынын еске саламыз. Егер отбасылық зорлық-зомбылыққа тап болсаңыз немесе қолдауға мұқтаж болсаңыз, көмек сұраудан тартынбаңыз, — дейді полиция департаменті.




