Облыс орталығында дәстүрлі KAZZINC FAMILY RUN отбасылық жүгіру фестивалі өтті. Спортты, салауатты өмір салтын және отбасылық құндылықтарды дәріптейтін ауқымды шараға 2 мыңнан астам адам қатысқан, деп хабарлайды F16.kz ШҚО әкімінің баспасөз қызметіне сілтеме жасап.
Шараның не басты ерекшелігі — қатысушылардың жас ерекшелігі негізге алынбайды. Тек балаларға, ересектерге, параспортшылар мен ерекше қажеттіліктері бар азаматтарға арналған түрлі қашықтықтар енгізілді. Кейбір жүгіру бағыттары жарыстан тыс форматта ұйымдастырылып, қатысушыларға спорттық нәтижеден бұрын белсенді демалыс пен көтеріңкі көңіл күй сыйлауға басымдық берілді.
Фестивальге Шығыс Қазақстан облысының әкімі Нұрымбет Сақтағанов та қатысып, 4,2 шақырымдық қашықтықты жүгіріп өтті.
Бүгінгі шара — жай ғана спорттық жарыс емес. Бұл — балалар мен ата-аналарды, достар мен спорт сүйер қауымды біріктіретін, салауатты өмір салты мен отбасылық құндылықтарды дәріптейтін мереке. Фестивальдің басты ерекшелігі — әр жастағы қатысушылардың бас қосуы. Өйткені үлкен жетістіктер мен жарқын жеңістер әрқашан кішкентай қадамнан басталады, — деді аймақ басшысы.
Жарыс қорытындысы бірнеше жас санаты бойынша бойынша жеңімпаздар анықталып, марапатталды. Мәреге жеткен әр қатысушыға естелік медаль табысталса, жүлдегерлер арнайы медальдармен, дипломдармен және сыйлықтармен марапатталды.
