Биылғы қаңтар айында мемлекет меншігіне өткен Рахман қайнары тозып тұр. Көлдің төңірегі күресінге айналып, мұрты бұзылмаған тұмса табиғат қоқысқа толды. Шығыстағы әйгілі шипажайдың мәселесін әлеуметтік желі қолданушылары дүркін-дүркін көтеріп, дабыл қағып жатыр, деп хабарлайды F16.kz.
Көлдің төңірегі қоқысқа толды
Кейінгі бірер жыл мұғдарында ресми жұмыс істемей тұрғанымен Рахман қайнарын бетке алған жұрттың қатары жыл санап артпаса, кеміген жоқ. Бұл жер туристердің ең сүйікті демалыс орнына айналды рас. Алыс-жақыннан ағылған саяхатшылар Алтайдың төріне ат шалдырып, шипалы көлді көруге асығады. Туристердің көптігі жақсы шығар, одан жергілікті тұрғындар да, мемлекет те ұтпаса ұтылмайды. Бірақ туристерден кейін тау болып үйіліп қалатын қоқысты кім шығарады? Шипажайдың тазалығына кім жауапты?..
Қазір бұл жұмысты міндетті болмаса да Катонқарағай ұлттық паркінің қызметкерлері амалсыз атқарып жүр. Ұлттық парк өкілдері шипайжай аумағын қоқыстан тазарту олардың құзыретіне кірмейтінін айтты.
Рахман орманшылығының инспекторлары арнайы қоқыс жәшіктерін орнатып, қалдықтарды аптасына 1-2 рет полигонға шығарып отырады. Олар жәшіктердің ғана тазалаумен шектелмей, шипажай аумағын түгел қоқыстан тазартады. Бірақ қалдықтарды жинау мемлекеттік инспекторлардың негізгі міндетіне кірмейді, осыны есте сақтауымыз керек, – деп жазды Катонқарағай ұлттық паркі.
Табиғат қорғаушылар көлге келген демалушылардан тазалықты сақтап, қоқысты шашып кетпеуді сұрады.
Рахман қайнарындағы көпшілікті алаңдатқан жағдайға байланысты @altai_jeep_tours жобасының ұйымдастырушылары да туристерге үндеу жолдады. Бейнеүндеуде блогер туризмнің екінші қыры туралы баяндайды.
Жаға — қоқыс тастайтын жер емес. Орман — әжетхана емес. Тоқтаңыздар. Егер табиғатты шынымен аяласаңыздар, іспен дәлелдеңіздер. Қоқысты өздеріңізбен бірге алып кетіңіздер, — делінген бейнеүндеуде.
Бұрынғы сән-салтанаттан жұрнақ та қалмаған
Шипажай мемлекет меншігіне өткенде жағдай жақсарып, туризм саласы түлейді деген көптің үміті су сепкендей басылды қазір. Шашылған қоқысты айтпағанда, Рахманның аузындағы бейберет сауда, тозған үйлер, бағасына сапасы сай емес қызмет бәрі де көңілге кірбің түсіреді. Соған қарамастан санаторий аумағына кіргені үшін ақы төлейді адамдар. Жалға берілетін үйлер де бар мұнда.
Жуықта блогер Ахмет Чукеев әлеуметтік желідегі парақшасында Рахман қайнары туралы ақпарат жариялады.
Бір кездері мен осы жерде – Рахман қайнары шипажайында демалған едім. Бұл нағыз керемет, ғажайып орын болатын! Көлікті ішке кіргізбейтін, заттарды арнайы гольф-карлармен таситын. Нөмірлер тап-таза, жылы, кабельді теледидар көрсететін. Ақ халат, жоғары деңгейлі қызмет көрсету, тыныштық… Ал мейрамханасы… нағыз ләззат сыйлайды.
Қазір бұл шипажай қараусыз қалған. Кейбір үйлер қираған, шөп белуардан асады. Аумағы қалың шөпке толып кеткен, ал бұрынғы жайлылық пен тәртіптің ізі де жоқ. Мұндай күйде тұрғанын көру — өте өкінішті.
Жүрегің сыздайды…Рахман қайнары баяғыдай қайта түлей ала ма екен? – деп жазды блогер.
Сонымен қатар Ахмет Чукеев достарымен бір үйді 150 мың теңгеге жалға алғанын, бірақ ақы төлегені үшін оған ешқандай түбіртек (чек) бермегенін жазды.
