Шығыс Қазақстан облысында сайлау науқанына дайындық барысы талқыланды. Орталық сайлау комиссиясының төрағасы Нұрлан Әбдіровтің жетекшілігімен өткен кеңесте комиссия мүшелерінің кәсіби даярлығы, дауыс беру процесінің заң талаптарына сай ұйымдастырылуы мен қоғамдық қауіпсіздіктің қамтамасыз етілуі сынды мәселелер қаралды, деп хабарлайды F16.kz.
Өңірде 484 мың сайлаушы тіркелген. 534 сайлау учаскесі жұмыс істейді. Оның 33-і – жабық учаске.
– Бірмандатты аумақтық сайлау округтері бойынша 528 кандидат тіркелді. Ал партиялық тізімдер бойынша тағы 49 адам ұсынылды, – деді жиында баяндама жасаған ШҚО әкімі аппаратының басшысы Ерлан Текешов.
Орталық сайлау комиссиясының төрағасы Нұрлан Әбдіров округтік сайлау комиссияларын даярлау мәселесіне арнайы тоқталды. Өйткені соңғы үш жылда ауылдық округтердегі комиссия мүшелері сайлау процесіне қатыспаған. Сондықтан оларды оқытып, сайлау рәсімдерін өткізу тәртібін түсіндіру және заңнама талаптарының қатаң сақталуын қамтамасыз ету маңызды екенін атап өтті ОСК төрағасы.
ШҚО Полиция департаментінің басшысы Ерлан Омарбеков қарашадан бастап тәртіп сақшылары күшейтілген жұмыс режиміне ауысқанын мәлімдеді. Үгіт материалдары орналастырылған орындар құқық қорғау органдарының тұрақты бақылауында. Бүгінге дейін ешқандай заңбұзушылық тіркелмеген.
Сонымен қатар дауыс беру кезінде сайлау учаскелерінде мүгедектігі бар азаматтарға арналған арнайы орындар болады. Ерекше қажеттілігі бар азаматар үшін жасырын дауыс беру кабиналары да жабдықталады. Есту қабілеті бұзылған сайлаушыларға көмек көрсету үшін 141 сайлау учаскесінде ымдау тілі мамандары қызмет көрсетеді.
Айта кетейік, бүгін сайлау комиссияларының мүшелеріне арналған оқу семинары өтеді.
