Зайсан ауданының Сарытерек ауылындағы мәдениет үйі тұтас жаңартылып, қайта ашылды.
Мәдениет үйінің ашылуына орай ұйымдастырылған салтанатты іс-шараға облыс әкімі Нұрымбет Сақтағанов пен «Қазақстан халқына» қоғамдық қорының Басқарма төрағасы Ләззат Шыңғысбаева қатысты.
1961 жылы салынған ғимарат ұзақ жылдар бойы ауыл мәдениетінің ошағы болды. Енді заман талабына сай жаңартылып, заманауи жабдықтармен жарақталды. Жаңа мәдениет үйі 180 адамға арналған мәдени-рухани орталыққа айналды.
«2024-2025 жылдары облыстық бюджеттен мәдениет үйінде күрделі жөндеу жұмыстарын жүргізуге 345 млн теңге бөлінген. Аумақты абаттандыру мен қосымша жөндеу жұмыстарына тағы 11,6 млн теңге бағытталды» — делінген облыс әкімдігінің ресми телеграм-арнасындағы ақпаратта.
Нысанды жаңғыртуға «Қазақстан халқына» қоғамдық қоры да қолдау көрсеткен. Қордың көмегімен жүзеге асқан «QH Мәдени даму алаңы» жобасы аясында мәдениет үйі заманауи құрал-жабдықтармен қамтылып, оған іргелес аумақ жабдықталыпты. Жобаға жалпы сомасы 185,2 млн теңге бағытталып, ауылдық кітапхана да жаңғыртылған.
«Мемлекет басшысы Қасым-Жомарт Тоқаев өңірлерді дамытуға, халықтың өмір сүру сапасын арттыруға ерекше мән беріп келеді. Біздің басты мақсатымыз — қала мен ауыл тұрғындарына мәдени игіліктерге қол жеткізуде тең мүмкіндік жасау. Ауыл баласы да туған жерінде өнерін шыңдап, қабілетін дамыта алуы тиіс. Осы орайда ауыл мәдениетін дамытуға қолдау көрсетіп, жобаның жүзеге асуына зор үлес қосқан «Қазақстан халқына» қоғамдық қорына алғысымды білдіремін», — деді облыс әкімі Нұрымбет Сақтағанов.
Жаңартылған мәдениет үйінде түрлі шығармашылық бағыттарды дамытуға арналған арнайы студиялар бар. Медиастудияда фото және бейнетүсірілім жасауға, бейнемонтаж бен цифрлық контент әзірлеуге болады. Ал дыбыс жазу студиясы ән жазып, музыкалық шығармаларды кәсіби деңгейде өңдеуге мүмкіндік бар.
Сондай-ақ фольклорлық студия, домбыра, баян және қобыз үйірмелері, театр, вокал және косплей студиялары жұмыс істейді. Хореография залы да жас өнерпаздардың шығармашылық ізденісіне жол ашады.
Косплей студиясында түрлі кейіпкерлердің бейнесін жасап, костюмдер әзірлеу арқылы ауыл жасөспірімдерінің қиялы мен шығармашылық қабілетін шыңдауға мүмкіндік бар.
