2026 жылғы 30 қазанда Бішкек қаласында Қазақстан Республикасының Премьер-Министрі Олжас Бектенов пен Қырғыз Республикасының Министрлер Кабинетінің Төрағасы Әділбек Қасымалиевтің қатысуымен Қазақстан мен Қырғызстан арасындағы II Өңіраралық ынтымақтастық форумы өтті.
Шығыс Қазақстан облысының делегациясын облыс әкімінің орынбасары Ринат Құрмамбаев бастап барды. Делегация құрамына өңірдің жетекші туристік компаниялары да кірді.
Форумның маңызды нәтижелерінің бірі – Шығыс Қазақстан облысының әкімдігі мен Қырғыз Республикасы Президентінің Ыстықкөл облысындағы Өкілетті өкілінің аппараты арасында ынтымақтастық туралы меморандумға қол қойылуы болды. Құжатқа ШҚО әкімінің орынбасары Ринат Құрмамбаев пен Қырғыз Республикасы Президентінің Ыстықкөл облысындағы өкілетті өкілі Б.Ж. Жетигенов қол қойды.
Сонымен қатар, Шығыс Қазақстан облысының Туристік ақпараттық орталығы бішкектік «Ак-Сай Тревел» компаниясымен ынтымақтастық туралы меморандумға қол қойды. Келісім туристік байланыстарды нығайтуға, өзара туристік ағынды арттыруға және Шығыс Қазақстанның туристік әлеуетін Қырғызстан нарығында ілгерілетуге бағытталған.
Форум аяқталғаннан кейін Шығыс Қазақстанның туристік компаниялары өкілдері іскерлік бағдарламаны жалғастырып, ынтымақтастықты дамыту бағытында практикалық жұмыстар жүргізу үшін Қырғызстанда қалады. Бағдарлама аясында туристік және этнографиялық нысандарды аралау, гастрономиялық туризм мүмкіндіктерімен танысу, туристік инфрақұрылымды зерделеу және қырғызстандық әріптестермен кәсіби тәжірибе алмасу жоспарланған.
Ыстықкөл облысымен ынтымақтастықты дамыту туристік алмасуды кеңейтуге, Қырғызстаннан келетін туристер санын арттыруға және Шығыс Қазақстанды халықаралық туризмнің перспективалы бағыты ретінде ілгерілетуге қосымша мүмкіндіктер ашады.




