Ішкі істер министрінің орынбасары Санжар Әділов Өскемендегі «Казцинк» зауытында болған жарылыстың басты себептерін атады. Лаузымды тұлғаның айтуынша, апатқа адами фактор әсер еткен болса, кінәлілер 7 жылға дейін сотталуы мүмкін, деп хабарлайды F16.kz.
Негізгі болжамның бірі, техногендік процестің бұзылуы, екіншісі – адам факторы, яғни еңбекті қорғау ережелерінің сақталмауы. Қазір осы екі негізгі нұсқа тексеруге алынды. Уәкілетті мемлекеттік органдардың, Өнеркәсіп министрлігінің және облыс әкімдігінің мамандары жұмыс істеп жатыр. Комиссияның қорытындысы мен кешенді сот сараптамасының шешімі тергеуге бағыт беріп, кінәлілерді қылмыстық жауапкершілікке тарту мәселесін анықтайды, – деп жауап берді журналистер сауалына вице-министр.
Сондай-ақ Әділов апатқа кінәлі адамның 7 жылға дейін бас бостандығынан айырылуы мүмкін екенін хабарлады.
«Казцинктегі» жарылыс бойынша Қылмыстық кодекстің 156-бабы 4-бөлігіне сәйкес тергеу жүріп жатыр. Бұл бап жеті жылға дейінгі мерзімге бас бостандығынан айыру жазасын қарастырады. Тергеу-жедел тобының құрамында тәжірибелі мамандар бар. Бүгін біз оннан астам сот сараптамасын тағайындадық, олардың негізгі міндеті – жарылысқа не себеп болғанын анықтау, – деп түсіндірді спикер.
Вице-министр сондай-ақ әзірге нақты бір күдіктінің жоқ екенін айтты.
Бұған дейін жазғанымыздай, 5 мамырда таңертең Өскемендегі «Казцинк» аумағында жарылыс болып, өрт шыққан. Кейін тілсіз жау толық сөндіріліп, оқиға орнында құтқару-іздестіру жұмысы басталды. Үкімет басшысы Олжас Бектенов жағдайды жеке бақылауына алды.
Шығыс Қазақстан облысының экология департаменті зауыттағы жарылыстан кейін тексеру жүргізіп, атмосфералық ауа құрамында зиянды заттар мөлшері белгілі шектен асып кетпегенін хабарлады.
Компания жарылыстан екі адам қаза тауып, бес адам зардап шеккенін растады. Төтенше жағдайлар министрлігі өрттің аумағын нақтыласа, дәрігерлер жарақат алғандардың жағдайы туралы ақпарат берді.
Облыстық полиция департаменті екі жұмысшының өліміне қатысты қылмыстық іс қозғады. Сонымен қатар, тергеу үшін ведомствоаралық комиссия құрылатыны хабарланды. Санитарлық-эпидемиологиялық қызмет те зауыттағы оқиғадан кейін ауаның құрамын тексерді.
