Кейінгі кезде БАҚ пен әлеуметтік желілерде таралған «Kaspi.kz картасының жылдық қызмет көрсету құны 10 мың теңгеге дейін өседі» деген ақпарат жалған болып шықты. Бұл туралы банктің баспасөз қызметі мәлім етті, деп хабарлайды F16.kz.
Компания тарапынан ешқандай тариф өсімі жоспарланбаған, клиенттерге арналған шарттар өзгеріссіз қалады.
Интернетте Kaspi.kz тарифтерінің өзгеретіні туралы ақпарат тарады. Атап айтқанда, Kaspi Gold картасының жылдық қызмет көрсету құны мен қайта шығару бағасы, Kaspi Pay шарттары және басқа банктердің карталарына аударым жасау комиссиясы жөнінде айтылған. Бұған Қазақстан Республикасының заңнамасына сәйкес шекті мәндер көрсетілген жаңартылған тарифтер туралы заңдық құжатты қате түсіндіру себеп болды, — деп хабарлады компанияның баспасөз қызметі.
Қазақстандағы барлық екінші деңгейлі банктер заң талаптарына сәйкес «шекті тарифтер» туралы құжаттарды жариялап отырады. Бұл құжаттарда банк белгілі бір қызмет үшін ала алатын ең жоғары мүмкін сома көрсетіледі. Алайда бұл — нақты қолданылатын баға емес.
Қарапайым тілмен айтқанда, шекті тариф — «ең жоғары мөлшер қанша болуы мүмкін» деген шек қана. Банктер мұндай шекті алдын ала белгілеп қояды, себебі болашақта құжаттарды жиі өзгертпеу үшін икемділік қажет. Ал клиенттердің іс жүзінде төлейтін комиссиялары әдетте әлдеқайда төмен болады. Яғни құжатта жоғары сандардың көрсетілуі қызмет қымбаттайды дегенді білдірмейді. Бұл — заңнамалық талапқа сай рәсімделетін техникалық құжат.
Kaspi.kz-тің шекті тарифтері де, нақты қолданылатын тарифтері де 2017 жылдан бері өзгермеген. 2026 жылы да олар сол күйінде сақталады.
Демек, Kaspi картасының жылдық қызмет көрсету құны қымбаттамайды.
