Қазақстан халқының саны 20,6 миллионнан асты. Жыл басынан бері ел тұрғындарының қатары 133 707 адамға көбейген. Бұл туралы Ұлттық статистика бюросының 2026 жылғы 1 қазандағы мәліметінде көрсетілген, деп хабарлайды F16.kz.
Статбюро дерегінше, қазан айында халық саны 20 633 529 адамға жетті. 1 қыркүйектегімен салыстырғанда тұрғындар саны 14 733 адамға артқан.
Халық саны бойынша Алматы қаласы көш бастап тұр. Мұнда 2 392 105 адам тұрады. Одан кейінгі орында – 2 141 409 тұрғыны бар Түркістан облысы.
Тұрғындар саны миллионнан асатын өзге өңірлер мен қалалар қатарында:
— Астана – 1 707 150 адам;
— Алматы облысы – 1 618 422 адам;
— Шымкент – 1 320 743 адам;
— Жамбыл облысы – 1 209 574 адам;
— Қарағанды облысы – 1 130 336 адам.
Ал халық саны ең аз өңір – Ұлытау облысы. Мұнда 217 046 адам тіркелген. Солтүстік Қазақстан облысында 510 181, Абай облысында 590 160 тұрғын бар.
Жыл басынан бері жиырма өңір мен республикалық маңызы бар қалалардың сегізінде ғана халық санының өсімі байқалған. Олардың қатарында Астана, Алматы, Шымкент қалалары, сондай-ақ Алматы, Ақмола, Ақтөбе, Атырау және Маңғыстау облыстары бар. Қалған 12 өңірде тұрғындар саны керісінше азайған.
Жалпы жыл басынан бері Қазақстан халқы 133 707 адамға көбейді. Оның 128 303-і табиғи өсімнің нәтижесінде, ал 5 404-і көші-қонның оң сальдосы есебінен.
Статистикалық мәліметтерге сәйкес, қала тұрғындарының саны жыл басынан бері 169 048 адамға артып, 13 254 158-ге жеткен.
Ал ауылдық жерлерде кері көрсеткіш тіркелді. Тоғыз айда ауыл халқының саны 35 341 адамға қысқарған. 1 қазандағы жағдай бойынша ауыл тұрғындарының жалпы саны 7 379 371 адам болып тұр.




