Күні кеше облыс орталығында көпшіліктің көңілінен шыққан кезекті кеш өтті. Өскемендіктер асыға күтетін Конституция күні мен Қала күні қарсаңыда облыстық драма және оперетта театры көрерменге ерешке сыйлық жасады, деп хабарлайды F16.kz.
Жаздың соңғы күндерін өзгеше өткізгісі келген жұрт кеше облыс орталығындағы «Жастар» саябағына жиналды. Мұнда бұрын соңды болмаған ашық аспан астындағы «Опереттаның жұлдызды шағы» классикалық музыка кеші өтті.
Еліміздегі ең маңызды мемлекеттік мерекелердің бірі – Конституция күні қарсаңында қала тұрғындарына ерекше тарту жасағымыз келді. Тұрғындар саябақтың ішінде, ашық аспан астында серуен құрып, әсерлі әуендерден шабыттансын деген ниетпен осындай форматта өткізуді шештік. Мұндай кеш бұған дейін де өткен, бірақ бұл концерт, онда орындалатын шығармалар ерекше болды. Егер тұрғындардың көңілінен шығып жатса, шараны дәстүрлі түрде өткізу ойда бар, — дейді кештің көркемдік жетекшісі әрі дирижері Александр Галсанов.
Драма мен оперетта театрының солистері әйгілі арияларды, әлемдік классика жауһарларының шығармасын орындаса көпшіліктің ықыласына бөледі. Одан бөлек, хор мен балет әртістері орындаған хореографиялық қойылымдар да жиналған жұртшылықтың көңілінен шықты.
Кешкі салқынмен серуен құрғанды жақсы көреміз. Бүгінгі жай ғана саябақта серуендеп қайтпай, керемет кештің куәсі болдық. Мұндай классикалық музыка кешіне алғаш рет келіп тұрмын. Мен ойлағаннан да әсерлі, көңілді өтті. Ерекше эмоциямен алдым. Әртістердің шығармашылығы жандана берсін, алдағы уақытта басқа да қойылымдарға келемін, — деді қала тұрғыны Тамара Морозова.
Кеш соңында өнерпаздардың еңбегін бағалаған жұртшылық алғыстарын қошеметпен жеткізді. Саябақтан үйді-үйіне тарасқандар арасында осындай рухани кештердің жиі өтуін сұрағандар да болды.
