«Алтай» халық би ансамблі мен «Барқытбел» этно-фольклорлық ансамблі Тайюань қаласында ЮНЕСКО қолдауымен өткен үшінші халықаралық өнер фестивалінде жеңіске жетті, деп хабарлайды F16.kz.
Ауқымды мәдени шара әлемнің түкпір-түкпірінен келген шығармашылық ұжымдардың басын қосты.
Шығысқазақстандық ансамбльдер қазақ халқының тарихы мен бай мәдени мұрасын сахна төрінде әсерлі түрде паш етіп, көрерменнің көзайымына айналды.
Биыл «Алтай» ансамбліне — 5 жыл. Халықаралық деңгейдегі бұл жеңіс ұжымның таланты мен табандылығының, өнерге деген адалдығының айқын көрінісі болып отыр.
Шығыс Қазақстан облысының әкімі Нұрымбет Сақтағанов әлемдік сахнада жеңіс тұғырынан көрінген өнерпаздармен кездесіп, жеңістерімен құттықтады.
Қазақтың өнері әлем жұртына талынып, шабыттандырып келеді. «Алтай» мен «Барқытбел» ансамбльдері — Шығыс Қазақстанның мақтаныштары,– деді аймақ басшысы.
ЮНЕСКО өкілдері де шығысқазақстандық ансамбльдердің өнерін жоғары бағалап, оларды бүкіл құрлықтың үздіктері деп атады. Жеңіс жалауын желбіреткен жерлестеріміз ЮНЕСКО Президенті мен ұйымның Қытайдағы өкілі атынан берілген Алғыс хатты облыс әкімі Нұрымбет Сақтағановқа табыс етті.
