ШҚО полицейлері тұрғындарға бет-жүзді жабатын киімге қойылған шектеулерді түсіндіру жұмыстарын жалғастыруда, деп хабарлайды F16.kz тілшісі Polisia.kz сайтына сілтеме жасап.
Құқық қорғау органдарының қызметкерлері халық көп жиналатын жерлерге барып, қоғамдық қауіпсіздікті нығайтуға бағытталған жаңа заң нормаларын түсіндіріп жүр.
Еске салайық, 12 шілдеден бастап елімізде қоғамдық орындарда бет-жүзді толық жабатын киім мен аксессуарларды киюге тыйым салынды. Бұл шара құқық бұзушылықтардың алдын алу және қоғамдық тәртіпті сақтау мақсатында енгізілген. Сонымен қатар заңда бірқатар ерекше жағдай қарастырылған.
Бетті жабуға рұқсат етіледі:
- қызметтік міндеттерді атқару кезінде қорғаныс құралдарын қолданатын мамандарға;
- медициналық көрсеткіштер бойынша, соның ішінде медициналық маскаларды тағуға;
- төтенше жағдайлар кезінде;
- қолайсыз ауа райында – қатты аяз, шаңды дауыл және т.б.;
- спорттық, мәдени және мерекелік іс-шаралар кезінде.
– Полицейлер жаңа талаптар азаматтардың құқықтарын шектемейтінін, керісінше тыныштықты қамтамасыз етуге және құқық бұзушылықтардың алдын алуға бағытталғанын еске салады, – деп жазады дерек көзі.
