Бүгін Шығыс Қазақстан облысының әкімі Нұрымбет Сақтағанов Өскеменде салынатын бірқатар нысанның жобаларымен танысып, жер учаскелерін аралады, деп хабарлайды F16.kz.
Аймақ басышы ат басын ең әуелі Сәтбаев даңғылындағы «ЛИК» тұрғын үй кешені аумағына бұрды. Онда алдағы жылдары әмбебап спорт аренасы салынады деп жоспарланып отыр.
Төрт қабатты ғимараттың бірінші қабатында 5 мың көрермен сыятын шағын футбол аренасы, бассейн, көркем гимнастика залы, дәмхана, медицина орталығы, ал үшінші қабатта баскетбол, волейбол залдары орналасады. Аталған жоба өңірде бұқаралық спортты дамытуға және түрлі жарыстарды жоғары деңгейде өткізуге мүмкіндік бермек, — деді облыс әкімінің баспасөз қызметі.
Аймақ басшысы одан кейін конгресс-холл салынатын Есенберлин даңғылындағы жер учаскесінде болды. Жалпы сыйымдылығы 1500 орындық екі концерт залы бар жаңа орталық 3 қабаттан тұрады. Онда концерт, форум, фестивальдер мен түрлі іс-шаралар өткізіледі. Тәуелсіздік монументінің жанында орналасқан жер учаскесінің аумағы — 4 гектар.
Ал оның қасынан 500 орындық мұз сарайын салу жоспарланған. Ол тарихы тереңде жатқан шығысқазақстандық хоккейді, коньки спортын, мәнерлеп сырғанауды дамытуға мүмкіндік береді.
Облыс әкімі бұл үш ірі жоба Шығыс Қазақстан облысының орталығында қалыптасып келе жатқан жаңа спорттық-мәдени кеңістіктің негізін қалайтынын атап өтті.
