А. С. Пушкин атындағы Шығыс Қазақстан облыстық кітапханасында Мемлекет басшысы Қасым-Жомарт Тоқаевтың «Әділетті қоғамға – шыншыл сөз» атты еңбегін таныстыруға арналған мазмұнды кездесу өтті.
Еркін форматтағы пікірталас алаңына өңірдің зиялы қауым өкілдері, танымал ғалымдар, қоғам қайраткерлері, белсенді жастар, үкіметтік емес ұйым өкілдері, түрлі мекеме қызметкерлері мен кітапхананың тұрақты оқырмандары жиналды.
Шара барысында сөз алған қалалық мәслихат депутаты, халықаралық «Қазақ тілі» қоғамы ШҚО филиалының төрағасы Әскерхан Ақтай жаңа басылымның тарихи әрі саяси маңызына тоқталды.
Бүгін Мемлекет басшысы Қасым-Жомарт Тоқаевтың «Әділетті қоғамға – шыншыл сөз» атты кітабының таныстырылымы өтіп жатыр. Аталған еңбекте Тәуелсіздіктің алғашқы жылдарынан бергі баяндамаларда, мақалаларда, сұхбаттар мен бұған дейінгі кітаптарда айтылған салмақты ойлар жүйеленіп енгізілген. Сондай-ақ еңбекте мемлекеттілікті нығайту, әділеттілік пен заң үстемдігі, білім мен ғылым, ұлттық құндылықтар, тарихи сана, мәдениет, тіл мен руханият, сонымен қатар ұрпақ тәрбиесі секілді стратегиялық маңызды тақырыптар кеңінен қамтылған. Қазіргі таңда бұл басылымның таныстырылымы еліміздің барлық өңірінде ұйымдастырылып жатыр, — деді Әскерхан Ақтай.
Кездесуге қатысушылар Президент еңбегінде заң мен тәртіптің сақталуы, ұлттық мүддені қорғау және ашық қоғамдық диалог құру мәселелеріне ерекше назар аударылғанын баса айтты. Басқосу аясында қазіргі қоғамның даму үдерістері мен заманауи сын-қатерлерге қатысты еркін пікір алмасу өтті.
Зиялы қауым өкілдерінің пікірінше, бұл жинақ — тек тарихи құжаттардың жиынтығы емес, әрбір азаматты ел болашағына жауапкершілікпен қарауға үндейтін, Әділетті Қазақстанды құрудың нақты бағдаршамы.
Жиында ерекше мән берілген түйткілді тақырыптардың бірі — жастардың қоғамдағы орны мен олардың әлеуетін арттыру болды. Мемлекет басшысы өз еңбегінде жастардың сапалы білім алуына, кәсіби тұрғыда үздіксіз дамуына, қоғамдық-саяси өмірге белсенді араласуына айрықша маңыз береді. Жиынға қатысқан жастар өкілдері Президент ұсынған бұл бастамалардың өскелең ұрпаққа үлкен сенім ұялататынын және жаңа мүмкіндіктерге жол ашатынын атап өтті.
