Биылғы вегетация кезеңінде Қазақстандағы судың «қара нарығына» қарсы күрес аясында Су ресурстары және ирригация министрлігінің бассейн инспекциялары заңнаманы бұзғандарға 310 айыппұл салды. Олардың жалпы сомасы 58 миллион теңгеден асты, деп хабарлайды F16.kz министрлікке сілтеме жасап.
Садыстырмалы түрде алып қарайтын болсақ, былтырғы суару маусымында су заңнамасын бұзғандарға 15,8 миллион теңге көлемінде 188 айыппұл салынған.
Су ресурстары және ирригация министрлігі вегетация кезеңінде Қазақстанның оңтүстігінде төрт жұмыс тобын құрғанын еске сала кетейік. Олар өңірлерде судың әділ бөлінуін қамтамасыз етіп, су шаруашылығы жағдайына тұрақты мониторинг жүргізді.
– Бас прокуратураның, құқық қорғау және өзге де мемлекеттік органдардың қатысуымен министрлік республика деңгейінде судың «қара нарығына» қарсы іс-қимыл жөніндегі ведомствоаралық жұмыс тобын құру жұмыстарын жүргізіп жатыр. Қазір Бас прокуратурамен бірлесіп, заңсыз су алу фактілеріне қарсы іс-қимылдарды жалғастыру алгоритмі әзірленіп жатыр, – деді Су ресурстары және ирригация бірінші вице-министрі Нұрлан Алдамжаров.
