Күршім ауданында жер ресурстарын тиімді пайдалану бағытындағы жұмыстар жалғасуда. Бұл туралы Өңірлік коммуникациялар қызметінде өткен брифинг барысында Күршім ауданының әкімі Мейіржан Әлібеков айтты, деп хабарлайды F16.kz.
Белгілі болғандай, бүгінде ауданның жалпы жер қоры 1 миллион 216 мың гектардан асады. Оның ішіндегі 21 мың гектар – егістік жер, 16 мың гектар – тыңайтылған алқап, 37 мың гектар – шабындық, ал 746 мың гектар – жайылымдық жерлер екен.
Биыл ауданның жер қатынастары бөлімі жер пайдаланушыларға 47 учаскені берді. Олардың жалпы аумағы 6,4 мың гектарға жетеді. Бұл учаскелердің ішінде егістік, шабындық, жайылым және өзге мақсаттағы жерлер бар.
Сонымен қатар, 2025 жылы тұрғындарға тегін қысқа мерзімге шабындыққа пайдалану үшін 5 жылға 496 гектар жер бөлінді. Оның негізгі бөлігі – шабындық жерлер.
Жыл басынан бері аудандық жер комиссиясы 15 отырыс өткізіп, 150-ге жуық өтінішті қараған. Ал «E-Qazyna» веб-порталы арқылы екі аукцион өткізіліп, жалпы аумағы 5,83 гектар жер телімі сатылымға шығарылыпты.
– Әрине, бұл саладағы ең маңызды жұмыстардың бірі – пайдаланылмай жатқан жерлерді мемлекет меншігіне қайтару. 2025 жылдың тоғыз айында Күршім ауданында осындай 69 жер учаскесі кері қайтарылып, олардың жалпы көлемі 13,9 мың гектарға жеткен. Бұл – егістік, шабындық және жайылымдық жерлерді қамтиды. Нәтижесінде, жоспар 107,5 пайызға орындалған, – деп мәлім етті аудан әкімі.
Бұдан бөлек, Құйған ауылының солтүстік-батысында, 4 шақырым жерде орналасқан 49 жер учаскесіне (жалпы аумағы 4,9 гектар) арналған жерге орналастыру жобалары әзірленді. Алдағы уақытта бұл жерлер «E-Qazyna» порталы арқылы аукционға шығарылып, демалыс үйлерін салуға және орналастыруға ұсынылмақ.
