Риддерде «Құқықтық десант» жобасы басталды. 100-ден астам үй мен пәтерде түсіндіру жұмыстары жүргізілді, деп хабарлайды F16.kz тілшісі Polisia.kz сайтына сілтеме жасап.
Шығыс Қазақстан облысының құқық қорғау органдары ШҚО әкімдігімен бірлесіп, «Заң және тәртіп» тұжырымдамасы аясында Риддер қаласында «Құқықтық десант» пилоттық жобасын іске қосты. Жобаның басты мақсаты – құқық бұзушылық деңгейін төмендету, тұрғындарға құқықтық көмек көрсету, құқықтық сауаттылықты арттыру.
Дерек көзі хабарлағандай, акцияның алғашқы күнінде құқық қорғау органдарының қызметкерлері 100-ден астам үй мен пәтерді аралап, зейнеткерлермен және қала тұрғындарымен кездесті, олардың құқықтарын, қылмыстық қол сұғушылықтан қорғау шараларын және құқыққа қарсы әрекеттер үшін жауапкершілік қарастырылғанын түсіндірді.
– Отбасылық-тұрмыстық саладағы құқық бұзушылықтардың және алаяқтықтың алдын алуға ерекше назар аударылды. Сондай-ақ азаматтарға несие рәсімдеуді бұғаттау мүмкіндігі туралы ақпарат берілді, – делінген хабарламада.
«Аманат» партиясы алаңында Ардагерлер кеңесімен кездесу өтіп, онда қаржылық және интернет-алаяқтардан қорғану тәсілдері мен өзге құқықтық қауіпсіздік шаралары қарапайым тілде түсіндірілді.
Қаланың ірі сауда нүктелерінде азаматтарды жеке қабылдау ұйымдастырылды. Тұрғындарға білікті құқықтық көмек көрсетіліп, барлық сұраққа толық түсініктеме берілді, сондай-ақ заңда белгіленген тәртіппен қаралатын жазбаша өтініштер қабылданды.
