2025 жылғы 1 қазандағы жағдай бойынша мемлекеттік еңбек инспекторлары республикадағы 391 кәсіпорнының 9,3 мыңнан астам жұмысшысының алдында жалақы бойынша 2,2 миллиард теңгенің берешегі бар екенін анықтады. Сонымен бірге түрлі ұйымдарда жүргізілген тексерулер барысында еңбек құқығы бұзылуының 5,5 мыңнан астам фактісі әшкере болды, деп хабарлайды F16.kz.
Еңбек және халықты әлеуметтік қорғау министрлігінің хабарлауынша, жалақы бойынша берешегі және еңбек құқығының бұзылуы анықталған кәсіпорындардың басшыларына орындауға міндетті 2 932 ұйғарым берілді және 370,9 миллион теңгеден астам сомаға айыппұл салынды.
– Қабылданған шаралардың, оның ішінде жалақы бойынша берешекті өтеудің қатаң кестелері мен мерзімдерін белгілеудің нәтижесінде 8,9 мың жұмыскердің құқықтары қорғалды. Оларға 1,8 миллиард теңге төленді, – деп жазады министрліктің баспасөз қызметі.
Бұдан басқа, еңбек заңнамасының сақталуына мемлекеттік бақылауды қамтамасыз ету мәселелері ҚР Еңбек және халықты әлеуметтік қорғау министрлігінің ерекше бақылауында.
2025 жылғы 1 қазандағы деректер бойынша мемлекеттік еңбек инспекторлары 4 572 тексеру жүргізген, оның барысында 5 523 бұзушылық анықталған. Нақтылап айтсақ, арасында еңбек саласына қатысты – 4 590, еңбек қауіпсіздігі және еңбекті қорғау бойынша – 909, халықты жұмыспен қамтуға қатысты – 24 заңбұзушылық бар.
Белгілі болғандай. қабылданған шаралардың нәтижесінде 34 мың жұмысшының еңбек құқығы қорғалды.
