Осыдан бір жыл бұрын, 2024 жылдың қыркүйегінде Қазақстанда 11-13 жас аралығындағы қыз балаларды Адам папилломасы вирусына қарсы вакцинациялау шаралары басталған болатын. Содан бері елімізде 278,2 мыңнан астам профилактикалық егулер жасалған, деп хабарлайды F16.kz.
Денсаулық сақтау министрлігінен хабарлағандай, бүгінге дейін вакцинаның бірінші дозасын 170 мың, ал екінші дозасын 108,2 мың жасөспірім алған. Белгілі болғандай, иммундаудан кейін жағымсыз көрініс жағдайлары тіркелмепті.
АПВ-ға қарсы вакцинациялауды тиімді енгізу мен мониторингті қамтамасыз ету үшін иммундау барысына тұрақты бақылау жүргізіледі.
Вакцинаны қауіпсіз, төзімділігі жақсы және алдын алудың тиімді әдісі ретінде Дүниежүзілік денсаулық сақтау ұйымы ұсынады.
– Иммундау бағдарламасының негізгі мақсаты – әйелдерді АПВ-ның негізгі қоздырғышы болып табылатын жатыр мойны обырынан, сондай-ақ гениталдың кандиломаларды, анус және жыныс мүшелерінің обырын қоса алғанда, басқа да онкологиялық аурулардан қорғау, – деп жазады Денсаулық сақтау министрлігінің баспасөз қызметі.
Айта кетейік, бүгінде АПВ-мен сырқаттанудың ауыртпалығын және вакцинациялаудың тиімділігін ескере отырып, 147 ел бұл вакцинаны өздерінің ұлттық иммундау бағдарламаларына енгізген. Қазіргі кезде әлемнің 76 мемлекетінде АПВ-ға қарсы әйелдер мен ерлерді вакцинациялау жолға қойылған.
