20 қазан мен 19 қараша аралығында Ішкі істер министрлігі «Заң және тәртіп» идеологиясын ілгерлету мақсатында республика аумағында «Браконьер» жедел-профилактикалық іс-шарасын өткізген болатын, деп хабарлайды F16.kz тілшісі Polisia.kz сайтына сілтеме жасап.
– Басты мақсат – табиғатты қорғау заңнамаларын сақтау, браконьерлік және биологиялық ресурстар объектілерінің заңсыз айналымын анықтау және жолын кесу. Нәтижесінде табиғатты қорғау заңнамасын бұзудың 4 мыңнан астам дерегі анықталып, оның ішінде 93 қылмыс бойынша сотқа дейінгі тергеп-тексеру жұмыстары басталды, – деп жазады дерек көзі.
Сонымен қатар, 4 мыңнан астам құқық бұзушы әкімшілік жауапкершілікке тартылды. Атап айтсақ, аңшылық ережелерін бұзғаны үшін – 2 мыңнан астам, балық аулау ережелерін бұзғаны үшін – 627 және басқа құқық бұзушылықтар үшін – 685 адам айыппұл арқалады. Барлығы 39 миллион тенгеден астам айыппұл салынды.
– Іс-шара жүргізу барысында 258 текше метр заңсыз дайындалған ағаш, 4 тоннадан астам балық, 255 дана киік мүйізі, 11,6 шақырым тыйым салынған аулау құралдары, одан басқа 358 дана аңшылық қаруы, оның ішінде ішкі істер органдарында тіркелмеген 120 қару тәркіленді, – делінген хабарламада.
ІІМ қазақстандықтарды табиғатты қорғау заңнамаларын сақтауға және қоршаған ортаны қорғауға шақырады.
