Іс Қылмыстық кодекстің 104-бабы 1-бөлігіне (абайсызда адам өліміне себеп болу) сәйкес қаралды, деп хабарлайды F16.kz.
Өткен жылдың 2 тамызында Б.Александров атындағы Спорт сарайының фойесінде хоккейші мен Л. есімді азамат арасында жанжал шыққан. Оқиға бейнебақылау камерасына түсіп қалған.
Бейнежазбада көрінгендей, Л. хоккейшіні мойнынан қысып, біраз уақыт бойы жібермей ұстап тұрған.
Екеуін ажыратқан соң, хоккейшінің жағдайы күрт нашарлап, есінен танып құлаған. 19 жастағы жігіт жедел жәрдем келгенге дейін көз жұмған. Сараптама қорытындысына сәйкес, өлімнің себебі – мойынның рефлексогендік бөлігіндегі жарақаттың салдарынан жүректің рефлекторлық тоқтауынан болған.
– Сот шешімімен айыпталушыға 1 жыл 6 ай мерзімге бас бостандығынан айыру жазасы тағайындалды. Алайда «ҚР Конституциясының 30 жылдығына байланысты амнистия туралы» заңға сәйкес, сотталушы жазадан босатылды. Үкім әлі заңды күшіне енген жоқ, – делінген ақпаратта.
Еске салайық, бұған дейін F16.kz порталы Өскеменде «Торпедо» хоккей клубы ойыншысының өліміне қатысты сот отырысы басталғаны туралы жазған болатынбыз. Сондай-ақ клуб басшылығы үйқамаққа алынған ойыншымен келісімшартты ұзартпайтынын да хабарлаған.
