Катонқарағай ауданында салынып жатқан әуежай — өңірдің көлік инфрақұрылымын дамытудағы ең ірі жобалардың бірі. Бұл жоба Шығыс Қазақстандағы туризм саласының дамуына жаңа серпін бермек, деп хабарлайды F16.kz сайты.
Аудан табиғатының ерекше әсемдігі мен көрікті жерлері туристердің қызығушылығын жыл сайын арттырып отыр. Соның нәтижесінде мұнда келетін қонақтар саны да көбейіп келеді. Осыған байланысты әуе қатынасының іске қосылуы өңірге жетуді әлдеқайда жеңілдетіп, оның қолжетімділігін айтарлықтай арттырады.
Аудан әкімдігінің мәліметінше, жаңа әуежайдан Астана, Алматы, Өскемен және Семей қалаларына ішкі рейстер ашу жоспарланған. Сонымен қатар Қытай Халық Республикасы мен Моңғолия бағыттарына халықаралық әуе рейстерін іске қосу көзделіп отыр. Бұл жоба Катонқарағайдың халықаралық туристік бағыт ретіндегі әлеуетін күшейтеді.
Әуежайдың салынуы тек көлік қатынасын жеңілдетіп қана қоймай, өңірде жаңа жұмыс орындарының ашылуына, сондай-ақ қонақүй бизнесі мен қызмет көрсету саласының дамуына оң әсер етеді.
