Шығыс Қазақстан облысында «Шығыс Салбурыны-2025» халықаралық фестивалі басталды, деп хабарлайды F16.kz.
Бүгін Ұлан ауданы Бозанбай ауылының маңындағы Бүркіт төбеде салтанатты жағдайда бірнеше күнгі созылатын дүбірлі доданың шымылдығы түрілді.
Дәстүрлі фестивальдің биылғысына әдеттегідей еліміздің түкпір-түкпірінен жиналған құсбегілер қатысуда. Сондай-ақ Моңғолия, Венгрия, Қырғызстан, Қытай, Испания мен Ресейден келген мәртебелі меймандар да бар.
Еске салайық, осыған дейін бұл аумақта 37 киіз үйден тұратын этноауыл бой көтергенін, дәретханалар орнатылып, жарық пен су тартылғанын, негізгі сахна қойылғанын жазған болатынбыз. Қонақтар мен туристердің жайлылығы үшін фотоаймақтар мен қоқыс жәшіктері де орнатылған.
