5-8 қараша аралығында Өскеменде шайбалы хоккейден әйелдер арасындағы Азия чемпионаты өтеді, деп хабарлайды F16.kz порталы.
Турнир Халықаралық хоккей федерациясының (IIHF) жоспары аясында Қазақстан хоккей федерациясы, Шығыс Қазақстан облысының әкімдігі, сондай-ақ «Торпедо» хоккей клубының мұрындық болуымен ұйымдастырылады.
– Бұл – елімізде соңғы тоғыз жылда өткізілетін әйелдер арасындағы алғашқы халықаралық турнир. Чемпион атағы үшін Қазақстан, Жапония, Қытай және Корея құрамалары таласады. Ойындар Борис Александров атындағы Спорт сарайында өтеді, – деп хабарлайды ұйымдастырушылар.
Былтыр Қытайда өткен алғашқы Азия чемпионатында Қазақстан құрамасы қола жүлде иеленген болатын. Биыл ақпанда жалауын желбіреткен Азия ойындарында қазақстандық хоккейшілер Қытай мен Корея құрамаларын жеңіп, күміс медальға қол жеткізді. Ал алтын жүлде Жапония құрамасына бұйырды – олар Азиядағы ең мықты команда саналады және бұған дейін өткен олимпиадалық іріктеу турнирінде жеңіске жетіп, 2026 жылы Миланда ұйымдастырылатын Қысқы Олимпиада ойындарына жолдама алған болатын.
Айта кетейік, IIHF әйелдер рейтингісінде (2024 жылғы сәуірдегі дерек) Жапония – 7-орында, Қытай – 12-орында, Корея – 18-орында, ал Қазақстан – 22-орында орналасқан.
Төменде оқырман назарына жарыс ойындарының кестесін ұсынып отырмыз:
5 қараша
16:00 – Қытай – Корея;
19:30 – Қазақстан – Жапония.
7 қараша
14:00 – Жапония – Корея;
17:30 – Қытай – Қазақстан.
8 қараша
14:00 – Жапония – Қытай;
17:30 – Корея – Қазақстан.
Осы ретте ерекше атап өтерлік жайт, жанкүйерлер үшін кіру тегін болмақ. Турнирдің ресми ашылу салтанаты 5 қараша күні Қазақстан – Жапония матчының алдында өтеді.
