Катонқарағай ауданында ХХІІІ халықтық спорт ойындары жалауын көтерді. Дүбірлі додаға Өскемен, Риддер қалалары, Самар, Үлкен Нарын, Алтай, Күршім, Зайсан, Глубокое, Тарбағатай, Шемонаиха, Ұлан және Катонқарағай аудандарының спортшылары қатысып жатыр, деп хабарлайды F16.kz.
Айта кетерлік жайт, халықтық спорт ойындары 7 жылдан кейін былтыр өңірімізге қайта оралған еді. Былтыр спартакиада Зайсан жерінде өткізілген.
Алтайдың баурайында өтіп жатқан ауқымды спорт бәсекесінде ұлттық спорт жанашырлары мен жанкүйер қауым аударыспақ, көкпар, теңге ілу, жамбы ату, сондай-ақ құнан, топ, жорға жарыс және аламан бәйге сияқты ұлттық спорт түрлері бойынша тартысты сайыстарға куә болып жатыр.
Спартакиаданың шымылдығы көкпармен түрілді. Бұнда Катонқарағай мен Алтай, Шемонаиха мен Үлкен Нарын, Самар мен Марқакөл, Ұлан мен Өскемен, Глубокое мен Тарбағатайдың тақымы тастай шабандоздары өзара үздіктерді анықтады. Катонқарағайдың көкпаршылары Алтай ауданының командасына 0-4 есебімен есе жіберсе, Шемонаиха мен Үлкен Нарын тең ойын көрсетті. Ал Самар ауданының командасы Марқакөлдің көкпаршыларын 10-0 есебімен ойсырата жеңді. Осы күні Ұлан ауданының, Тарбағатай аудандарының да көкпаршылары үздік өнерімен көзге түсті.
Көкпаршылардың жарысы спартакиаданың екінші күні де жалғасты. Бұл күні сонымен бірге құрыш білек палуандардың ат үстіндегі жекпе-жегіне де куә болды жиылған жұрт. Аударыспақтан өткен сайыста спортшылар бірнеше салмақ дәрежесі бойынша сынға түсті. 57 келіде Ұлан ауданынан Елдар Ерланұлы қарсылас шақ келтірмей, жеңімпаз атанды. Осы салмақта екінші және үшінші орынды Өскеменнен Досжан Өтеген мен Самардан Бекболат Жаңбыршин өзара бөлісті. 74 келіде зайсандық палуан Бекболат Мұхамадиев үздік атанса, екіншіні катонқарағайлық Ануар Қайырбеков, үшінші орынды өскемендік Дарын Фархатов иеленді. 80 кг салмақ дәрежесінде сынға түскен 8 палуанның ішінен ұландық Бақтияр Жұмабеков бірінші, зайсандық Шалқар Қожахметов екінші орындарды еншілесе, үздік үштікті Үлкен Нарыннан Сейіл Құсайынов түйіндеді.
Осы күні теңге ілуден де спортшылар өзара кіл мықтыны анықтады. 11, 12, 13 маусым күндері дүбірлі дода аударыспақ, жамбы ату, теңге ілу сайыстарына ұласты. 14 маусымда спортсүйер қауым 7,5 шақырымдық құнан бәйге, 15 км топ бәйге, 7,5 км жорға жарыс пен бәйгенің – атасы 25 шақырымдық аламанды тамашалайды.
Серік Абай
