Шығыс Қазақстан облысының Катонқарағай ауданында салынып жатқан әуежай құрылысы кезінде бүлінген республикалық автожолдың бөлігін мердігер компания қалпына келтіретін болды, деп хабарлайды F16.kz.
Өскемен-Алтай-Үлкен Нарын-Катонқарағай-Рахман қайнары тас жолының бүлінген учаскесін өз қаражатына жөндеу міндеттемесін компания бас мердігермен үшжақты келісім арқылы бекітті. Компания жөндеу жұмысын кезең-кезеңімен жүргізеді, оның ауқымы мен мерзімін әріптестерімен келісе отырып атқарады.
Келісім қол қойылған сәттен бастап күшіне енді және ресми түрде тоқтатылғанға дейін жарамды болады. Құжат Шығыс Қазақстанның маңызды көлік бағыттарының біріндегі инфрақұрылымды сақтауға және жол қозғалысы қауіпсіздігін қамтамасыз етуге бағытталған.
Естеріңізге сала кетсек, кеше, 14 сәуірдеF16.kz редакциясына катонқарағайлық тұрғындар хат жолдап, “Белқарағай ауылы маңында әуежай салып жатқан мердігер компанияның 40 тонналық алып жүк көліктері Өскемен-Алтай-Үлкен Нарын-Катонқарағай-Рахман қайнары жолының тас-талқанын шығарды” деп шағымданған. Жолдың бүлінгені туралы фото—видео жазбалар әлеуметтік желілерде таралып, қоғамның қызу талқысына түсті.
Жауапты сала мамандарының айтуынша, әуежай құрылысы кезінде аталған республикалық жолдың 252-ші шақырымнан 311-ші шақырымына дейінгі аралығы шынымен де бүлінген. Құрылыс материалдарын тасымалдаған ауыр техниканың қарқынды қозғалысы салдарынан жол жабыны мен инженерлік құрылыстар зақымдалған.
Сонымен қатар жолдың бүлінуіне көктем кезінде топырақта, оның ішінде жол жабынында ылғалдың шектен тыс мол болуы да әсер еткен. Мұндай кезде ылғал жол жамылғысының бірнеше қабатына дейін бойлап, топырақ қабатының беріктігін төмендетеді.
Фото: ШҚО өңірлік коммуникациялар қызметі
