Келер жылы Марқакөл ауданында жол-көлік, инженерлік және туристік инфрақұрылымды кең көлемде жаңғыртуға бағытталған ауқымды бағдарлама жүзеге асырылады. Бұл туралы Өңірлік коммуникациялар қызметінде өткен брифингте Марқакөл ауданының әкімі Рүстембек Кемешев мәлім етті, деп хабарлайды F16.kz тілшісі ШҚО әкімінің сайтына сілтеме жасап.
ЖОЛ САЛУҒА ҚЫТАЙЛЫҚТАР КӨМЕКТЕСЕДІ
Қазіргі уақытта шекара шебіндегі Марқакөлде аудандық маңызы бар жолдардың қауіпсіздігін арттыру мақсатында екі негізгі бағыттағы жолға орташа жөндеу жүргізу үшін жобалық-сметалық құжаттама әзірленіп жатыр. Олар:
- «Омбы-Майқапшағай-Теректі-Игілік-Шенгелді» жолының ұзындығы – 45-30 шақырым, алдын ала құны – 1 350 миллион теңге;
- «Күршім-Қалжыр-Ақбұлақ-Қарой-Ашалы-Қайнарлы» жолының ұзындығы – 12 шақырым, құны – 1 080 миллион теңге.
Сонымен қатар, «Altai Invest-2025» халықаралық инвестициялық форумы аясында ШҚО жолаушылар көлігі және автомобиль жолдары басқармасы Қытайдың «Хэйлунцзян провинс Бада Роуд» компаниясымен Төсқайын ауылдық округіндегі жолдарды жөндеу саласында ынтымақтастық туралы меморандумға қол қойған.
ТУРИСТІК ОРТАЛЫҚҚА АЙНАЛАДЫ
Сондай-ақ «Altai Invest-2025» форумында Марқакөл ауданы әкімдігі мен «Aila Tau» ЖШС арасында 598 миллион теңгенің келісіміне қол қойылды. Мәселен, Шағанатты ауылында марал шаруашылығына бағытталған сауықтыру кешені салынады. Жобаның жүзеге асырылу мерзімі – 2026-2031 жылдар.
«Ауыл аманаты» бағдарламасы шеңберінде екі жоба мақұлданды:
- «Рахат Туризм» ӘКК – жабдықтарды жаңғырта отырып, қонақүйді қайта жаңарту;
- «Айсаб» ӘКК – Ақжайлау ауылында туристерді қабылдауға арналған 8 киіз үйден тұратын этноауыл салу.
Сонымен қатар, Ұранқай ауылында жеке «Markakol Lodge» жобасы іске асырылып, 6 глэмпинг-үй салынды. Ауыл ШҚО-дағы ең үздік рекреациялық аймақ ретінде танылып, оны дамытуға 200 миллион теңге бөлінді. Оның 100 миллион теңгесі 2026 жылы туристік инфрақұрылымды дамытуға бағытталады.
ҚАЙНАРЛЫ МЕН ТӨСҚАЙЫҢДА ЖАҢА БІЛІМ ОРДАЛАРЫ САЛЫНЫП ЖАТЫР
Бұдан бөлек 2026 жылы Марқакөл ауылында қуаттылығы 6 Гкал болатын орталық қазандық пен ұзындығы 12 шақырым жылу желілерінің құрылысы басталады.
Ал Боран ауылында ұзындығы 1,8 шақырым болатын су құбыры желілері мен 55 құдық жөнделді. Жалпы құны 200 миллион теңге болатын жоба аясындағы жұмысты «Айкен Құрылыс» ЖШС орындады. Қазіргі уақытта ауылдағы әлеуметтік нысандар мен жеке үйлер жаңа жүйеге қосылуда.
Ауданда білім саласына да қатысты жаңалық көп. Мәселен:
- Игілік ауылында 50 орындық мектеп құрылысы аяқталды (500 миллион теңге);
- Қайнарлы және Төсқайың ауылдарында сәйкесінше 50 және 100 орындық мектептер бой көтеруде (650 миллион және 960 миллион теңге).
Сонымен қатар, Марқакөл ауданына еліміздің еңбек ресурсы артық өңірлерінен 8 отбасы қоныс аударды. Барлығы тұрғын үймен және жұмыспен қамтамасыз етіліп, мемлекеттік қолдауға ие болды. Балалары мектеп пен балабақшаларға қабылданды, ал интернеттің қолжетімділігі көптеген отбасына онлайн жұмыс істеуге мүмкіндік берді.
